大約在四個月前，發生了一件令我「困惑」的事。

事實上，對我來說，不十分困擾；可是，因為那事對我身邊人造成困擾，因此，當對方找我訴苦，想我出口相助時，就令我不知如何是好。

話說，未搬公司時，我的位置離我組的同事較遠，卻與另一部門的同事靠近，於是，與別組的同事感情不俗。

某天早上，見坐在我旁的X同事，伏在辦公桌上，狀甚痛苦，於是上前問候，她告訴我頭暈。而我安慰她一番說拿必理痛給她，又建議她早些放工，但X只一味搖頭。情況一直延續到午飯後，X開始在呻吟：「啤娜，救我呀……我頂唔順喇……唔得喇……我就嘔啦……」

我大吃一驚，即時上前問候，這時，她忽然問：「你真係唔覺，定唔出聲？」

「……」

「好大陣臭孤味呀！我唔聞得臭孤架，我已聞咗成個禮拜，今日真系唔得啦。」X十分認真地說。

X所指的臭孤，源自我組某位同事；其實，我是知道的，雖然，有時味道真的好利害，但我坐得較遠，而且我對臭孤的反應不如X嚴重，還可以忍耐。

x於是開始求我，叫我告訴那同事。但我認為很難啟齒，言語間表示難做，竟令X激動起來：「估唔到你聞到臭孤！你居然接受到臭孤……」

救命！我都唔聞得架！大家同事咪遷就下囉！

今個夏天，X幾乎隔日就求我向那同事說出其體臭一事。而這事，亦傳遍X那組的同事，大家都說每次經過該同事的位，都要閉氣，因此，希望我出口的人也多了。

「點解你係都要我做丑人啫？你知唔知好hurt人架！」我很無奈。

X解釋不出口的原因是：因為她們從不與那同事說過話，一開口就告訴人有臭孤好唐核。她覺得我敢言直率，加上對方是我的同事，這是為了對方好云云。而X又不斷向我灌輸──告訴人有臭孤不是衰人，是值得表揚的好事，並不惜以親身經歷說明之。

「我自己都好大汗，我有時都聞下自己有無味，又叫老公聞下，一有就唔會咁大動作；如果有日你聞到我有臭孤，你話我知，我會好多謝你。」

其實，我真係好少特意去聞人的。

這幾個月特別熱，每當該同事又出外工作回公司，我就見到X痛苦地伏在枱上對著我呻吟：「啤娜呀……我好辛苦……」看得出是完全真情流露，更令我不知如何是好。

於是，我找平日言行大膽的美女幫忙，說知她一聽就好大反應；原來，她的位與該同事很接近，也是在死忍。

「不如同奶奶講啦，佢把口實講得出呢啲嘢；而且佢成日要同事優雅，實接受唔到臭孤。」美女說。

「唔得！」我反對：「呢排奶奶心情唔好，容乜易佢藉住儀表整潔的問題，惜勢抄咗佢。」

臭孤，這個問題，我們談了一個夏季；隨著我們搬公司，各部門大執位之後，ｘ坐到距離我們老遠的位置，我以為這事會平息。

誰知今天，在走廊位置碰上X，我見她成隻「青臉雞」咁，嚇了一跳，問她搞乜，於是她又說：「我真係頂唔順……」

「唔係嘛，隔成百呎都聞到？！」

原來，x如廁時巧遇該同事，雖然雙方前後腳，但因為孤味一直焗在女廁縈繞不散，而在X小解的數分鐘時間，已幾乎窒息，於是，一出廁所就走到廊位呼吸新鮮空氣。

我很明白X的感受，因為我母親都是那種對臭孤好敏感，一聞到會嘔的人。因此，當我知道X懷有個多月身孕時，更加相信她真係頂唔順。

於是，我在想：我是見死不救嗎？相信唔死得人啩，忍一忍海闊天空喇……究竟係咪應該解決呢？